Undirbúningur fyrir efnaskiptaaðgerð
Ef þú ert að velta fyrir þér hvort efnaskiptaaðgerð (magaermi eða magahjáveita) sé rétta meðferðin fyrir þig þá er þetta námskeið sem gæti hentað þér. Námskeiðið innifelur upplýsingar um heilbrigðan lífsstíl sem nauðsynlegur er til að koma jafnvægi á þyngdarstjórnunarkerfi líkamans áður en sérhæft inngrip eins og aðgerð fer fram. Námskeiðið inniheldur líka upplýsingar um lyfjameðferð vegna offitu þannig að þú getur tekið upplýsta ákvörðun um hvaða leið hentar þér best. Meginefni námskeiðsins eru síðan upplýsingar um efnaskiptaaðgerðir, val á aðgerð, undirbúining og eftirlit bæði fyrst eftir aðgerðina og einnig til langstíma.
Námskeiðið er nauðsynlegur hluti undirbúnings hjá Mín besta heilsa ef óskað er eftir greiðsluþátttöku hins opinbera vegna aðgerðar. Tilvísun er send á Landspítala þegar skilyrði fyrir efnaskiptaaðgerð teljast uppfyllt. Ef langur biðtími er eftir aðgerð á Landspítala er hægt að sækja um greiðsluþátttöku Sjúkratrygginga Íslands (SÍ) vegna slíkrar aðgerðar erlendis. Sjá skilyrði fyrir greiðsluþátttöku SÍ hér. Mikilvægt er að taka fram að þátttaka á þessu námskeiði veitir ekki sjálfkrafa rétt til að fá greiðsluþátttöku hins opinbera vegna aðgerðar. Til viðbótar við námskeiðið fara fram viðtöl og rannsóknir þar sem skoðað er hvaða meðferð á best við og lögð er upp viðeigandi meðferðaráætlun.
Efni námskeiðsins er kaflaskipt
Fyrsti hlutinn er aðgangur að námskeiðinu Grunnur að betri heilsu. Þar er að finna upplýsingar um hvernig hægt er að aðstoða líkamann til að fá sem best jafnvægi á þyngdarstjórnunarkerfin fyrir aðgerð. Ef sá undirbúningur er góður eykur það líkur á betri langtíma árangri aðgerðarinnar og einnig minni hættu á fylgikvillum bæði til lengri og skemmri tíma. Upplýsingar um aðgerðir og það inngrip sem aðgerð gerir í þyngdarstjórnun líkamans er að finna á námskeiðinu. Nauðsynlegt að skilja vel hvað hverju aðgerð breytir og hvað hún gerir ekki. Hvaða aðgerð á við og af hverju. Til að fá besta mögulega langtímaárangur aðgerðar skiptir miklu máli að vera tilbúinn og vel nestaður í þá óvissuferð sem við tekur eftir aðgerð því hver líkami svarar slíku inngripi á ólíkan hátt. Stundum hentar lyfjameðferð betur en aðgerð til meðferðar við offitu og á námskeiðinu er að finna upplýsingar um lyfjameðferð sambærilega þeirri sem er á námskeiðinu Lífsstíll og lyfjameðferð. Þannig er hægt að taka upplýsta ákvörðun um hvaða leið hentar best.
Enn meira máli skiptir að vera tilbúinn að vinna með breyttan líkama eftir aðgerðina. Eftir aðgerð tekur við ævilangt verkefni við að styðja líkamnn til að vinna sem best til að viðhalda jafnvægi á þyngdarstjórnunarkerfunum. Á námskeiðinu er bæði að finna upplýsingar sem nauðsynlegt er að hafa fyrstu vikurnar og mánuðina eftir aðgerð svo sem upplýsingar um næringu og mataræði. Það er efni sem verið hefur á námskeiði sem við nefndum Fræðsla fyrir aðgerð. Við höfum nú bætt við efni sem áður var á námskeiðinu Fræðsla eftir aðgerð en þar er að finna upplýsingar sem henta til lengri tíma eftir aðgerð. Efni námskeiðsins ætti þannig að henta vel bæði einstaklingum sem vilja skoða efnaskiptaaðgerð sem meðferðar kost og einng þeim sem einhverntíma hafa farið í efnaskiptaaðgerð til að styðja við heilsu.
Viðtöl og rannsóknir til undirbúnings fyrir efnaskiptaaðgerð
Inni á námskeiðinu er spurningalisti sem einstaklingar fylla út og senda. Í kjölfarið er bókað viðtal við Erlu Gerði lækni. Viðtalið er undirbúið með blóðrannsókn. Þannig koma báðir aðilar vel undirbúnir til viðtalsins og hægt er að skoða vel hvaða leið hentar og leggja sameiginlega upp áætlun fyrir næstu skref. Metið er hvort þörf er á meðferð hjá öðrum fagalilum fyrir aðgerð og sú meðferð þá hafin.
Mismunandi er hve langan tíma það tekur að uppfylla þessi skilyrði eftir heilsufarslegri stöðu og fleiri þáttum hjá hverjum einstaklingi. Þegar hægt er að votta að skilyrði fyrir greiðsluþátttöku hins opinbera séu uppfyllt er send inn viðeigandi tilvísun á Landspítala. Þar sem biðtími eftir aðgerð er að öllu jöfnu langur á Landspítala er samhliða send inn umsókn um greiðsluþátttöku aðgerðar erlendis til Sjúkratrygginga ef einstaklingur óskar og það er talið heilsufarslega skynsamlegt. Bókað er viðtal við Hjört Gíslason skurðlækni sem bæði starfar á Landspítala og hjá GBObesitas í Svíþjóð sem er samstarfsaðili Mín besta heilsa og Sjúkratrygginga. Undanfarin ár hafa flestir okkar skjólstæðingar valið að fara í aðgerðina í Svíþjóð vegna langs biðtíma aðgerða á Landspítala. Í samvinnu við GBObesitas fer reglubundið eftirlit fyrsta árið eftir aðgerð fram hjá okkur í Þönglabakkanum fyrir þá einstaklinga sem fara til Svíþjóðar eða þar til einstaklingur útskrifast til ævilangrar eftirfylgdar í heilsugæslu.
Kjósir þú að fara í efnaskiptaaðgerð og greiða fyrir hana úr eigin vasa hvort sem það er hjá GBObeistas eða annarstaðar, mælum við með því að þú farir í gegnum góðan undirbúning og þá getur þetta námskeið verið mjög hjálplegt.
Ef þörf er á miklum undirbúningi vegna líkamlegrar, andlegrar eða félagslegrar heilsu, er skynsamlegra að undirbúningur fyrir aðgerð fari fram á Reykjalundi. Beiðni um meðferð á Reykjalundi er hægt að fá í þinni heilsugæslu og við sendum einnig slíka tilvísun ef þörf er á.
Skráning á námskeiðið veitir aðgang að fræðsluefni í 6 mánuði. Þú getur tileinkað þér námsefnið þegar þér hentar, á þínum hraða. Hægt er að kaupa framlengingu á námskeiðinu á hagstæðum kjörum enda getur verið gott að rifja upp efnið og fletta upp upplýsingum þegar nýjar áskoranir detta inn í þessu langa ferli. Upplýsingar um það má finna inni á námskeiðinu.
Námskeiðin okkar eru lifandi og í stöðugri uppbyggingu. Sum myndbandanna eru upptaka frá okkar fyrri námskeiðum og aðrar upptökur eru glænýjar. Við erum stöðugt að vinna að nýju efni og útbúa ný verkfæri sem hægt er að nota.