Þetta námsefni hentar þeim sem vilja læra á þyngdarstjórnunarkerfi líkamans og finna leið til að halda þeim í jafnvægi svo líkaminn geti stýrt líkamsþyngd sinni á eðlilegan hátt. Hér er að finna leiðbeiningar um hvernig hægt er að koma betra jafnvægi á fjóra hornsteina heilsunnar, mataræði, hreyfingu, svefn og andleg líðan.
Við setjum efnið upp í nokkra kafla þannig að þú getir skoðað þína stöðu og lagt upp áætlun um hvað þarf að vinna með og hvernig skynsamlegt er að byggja upp verkefnið skref fyrir skref. Ef þörf er á sértækri offitumeðferð með lyfjum eða efnaskiptaaðgerð þá er hér að finna upplýsingar um hvaða leið gæti hentað þér, af hverju og hvert skal leita. Ef þú ert þegar á lyfjameðferð vegna offitu eða ert að velta fyrir þér slíkri meðferð er betra að fara á námskeiðið Lífsstíll og lyfjameðferð. Ef þú ert að velta fyrir þér efnaskiptaaðgerð þá hentar námskeiðið Fræðsla fyrir aðgerð betur og námskeiðið Fræðsla eftir aðgerð hentar betur ef þú hefur þegar farið í slíka aðgerð. Þetta grunnnámskeið er innifalið í hinum námskeiðunum.
Skráning veitir aðgang að fræðsluefni í 6 mánuði. Þú getur tileinkað þér námsefnið þegar þér hentar, á þínum hraða. Efni námskeiðsins er fyrst og fremst hugsað til þess að þú getir tekið upplýsta ákvörðun um hvaða leið hentar þér og fengið í hendur verkfæri til að vinna með þína heilsu. Námsefnið er einnig notað samhliða meðferð hjá fagfólki hjá Mín besta heilsa og er hluti af meðferðaráætlun sem sett er upp fyrir þig í viðtölum. Þannig er alltaf fyrsta skrefið að koma á námskeið á netinu og svo eru viðtöl undirbúin með spurningalistum og blóðrannsóknum. Þannig koma báðir aðilar vel undirbúnir til viðtalsins sem þá nýtist betur til að finna þá leið sem hentar þér best og til að leggja upp áætlun um næstu skref.
Sú nýbreytni verður á árinu 2025 að efni námskeiðanna verður einnig notað samhliða meðferð hjá fagaðilum á fleiri stöðum svo sem í Heilsubrú og heilsugæslum á höfuðborgarsvæðinu og á Akureyri. Námskeiðin verða einnig hluti af meðferð á Kristnesi og á innkirtladeild Sjúkrahússins á Akureyri. Nýsköpunarráðuneytið veitti svokallaðan Fléttustyrk til að samstarf þessara aðila gæti orðið að veruleika. Þannig verður hægt að fá stuðning fagaðila samhliða námskeiðunum bæði í einstaklingsviðtölum og í hópfræðslu sem nánar verður auglýst í Heilsubrú og á Akureyri. Einstaklingsviðtöl eða hópfræðsla er ekki innifalin í verði námskeiðanna hér á síðunni.
Námskeiðin okkar eru lifandi og í stöðugri uppbyggingu. Sum myndbandanna eru upptaka frá okkar fyrri námskeiðum og aðrar upptökur eru glænýjar. Við erum stöðugt að vinna að nýju efni og útbúa ný verkfæri sem hægt er að nota. Aðgangur að þessu grunnnámskeiði er innifalinn í hinum námskeiðunum okkar enda þarf sífellt að vinna við að styrkja þennan grunn hvað svo sem við veljum að bæta við.